ກອງບັນຊາການທະຫານປ້ອງກັນຊາຍແດນແຂວງເທື່ອທຽນເຫວ້ ໃຫ້ຮູ້ວ່າ:ຕໍ່ກັບການຜັນແປອັນສັບສົນຂອງພະຍາດໂຄວິດ-19, ໃນໄລຍະຜ່ານມາ, ໄດ້ຊີ້ນຳໃຫ້ຄ້າຍທະຫານປ້ອງກັນຊາຍແດນຕ່າງໆສ້າງຕັ້ງຈຸດກວດແລະກັນພະຍາດຈຳນວນ19ແຫ່ງປະຈຳຢູ່ບັນດາທາງນ້ອຍ, ທາງຍ່າງຕາມເສັ້ນຊາຍແດນຫວຽດນາມ - ລາວ.

ໂດຍໄດ້ກຳນົດຈິດໃຈວ່າ:“ຕ້ານພະຍາດຄືກັນກັບການຕ້ານສັດຕູ”, ບັນດານັກຮົບທະຫານປ້ອງກັນຊາຍແດນໄດ້ຕິດຕາມຈຸດກວດແລະກັນພະຍາດທັງເວັນທັງຄືນ 24/24 ຊົ່ວໂມງແລະບໍ່ໃຫ້ບັນດາເປົ້າໝາຍແປກໜ້າ, ພະຍາດແຊກຊຶມຜ່ານຊາຍແດນ.

ທ່ານນາງຟານມິນຫງວຽດ, ຮອງຫົວໜ້າພະແນກແຮງງານ - ເສຍອົງຄະແລະສັງຄົມແຂວງເທື່ອທຽນເຫວ້ພ້ອມດ້ວຍພະນັກງານຂອງພະແນກດັ່ງກ່າວໄດ້ໄປຢ້ຽມຢາມຈຸດກວດແລະກັນພະຍາດໂຄວິດ-19 ຈຳນວນໜຶ່ງທີ່ຂຶ້ນກັບຄ້າຍທະຫານປ້ອງກັນຊາຍແດນເຍີມ (ຕາແສງເຍີມ) ແລະຄ້າຍທະຫານປ້ອງກັນຊາຍແດນດ່ານອາເດິດ (ຕາແສງເລີມເດິດ, ໃນເມືອງພູດອຍອາເລື໋ອຍ).

ບັນດາຈຸດກວດແລະກັນພະຍາດດັ່ງກ່າວມີເງື່ອນໄຂພູມມີປະເທດທຸລະກັນດານ, ມີອາກາດຂ້ຽວຂາດ, ບັນດານັກຮົບກິນຢູ່, ດຳລົງຊີວິດແລະເຮັດວຽກມີຄວາມຫຍຸ້ງຍາກທີສຸດ, ແຕ່ຍາມໃດກໍເຕັມໄປດ້ວຍຈິດໃຈມີຄວາມຮັບຜິດຊອບສູງ.

ຢູ່ບັນດາຈຸດກວດແລະກັນພະຍາດ, ຄະນະພະນັກງານຂອງພະແນກໄດ້ຢ້ຽມຢາມຖາມຂ່າວກ່ຽວກັບວຽກງານ, ຊີວິດການເປັນຢູ່ຂອງບັນດານັກຮົບປ້ອງກັນຊາຍແດນ, ພ້ອມດຽວກັນນັ້ນ, ໄດ້ເປັນກຳລັງໃຈໃຫ້ບັນດານັກຮົບຕ້ອງມີຄວາມເຂັ້ມແຂງໃນການປະຕິບັດໜ້າທີ່. ທ່ານນາງຟານມິນຫງວຽດໄດ້ມີການມອບຂອງຂວັນຕ່າງໆແລະຫວັງວ່າບັນດານັກຮົບທະຫານປ້ອງກັນຊາຍແດນຈະປະຕິບັດວຽກງານກັນພະຍາດຢູ່ດ່ານຊາຍແດນໄດ້ເປັນຢ່າງດີແນໃສ່ການປະຕິບັດໜ້າທີ່ກວດແລະກັນພະຍາດໂຄວິດ-19 ໃຫ້ເປັນຢ່າງດີ.